U3F1ZWV6ZTMwMDA2MTc4MTgwMDkzX0ZyZWUxODkzMDQ5MTg1NjAxNw==

ابدأ ازاى ؟

mohamed ashry





 
بما إنك قررت البدء بدراسة شهادة cma لازم تعرف إن الشهادة دي تختص بمحاسبة التكاليف والمحاسبة الإداريه والماليه يعني مش هتدرسها عشان تبقي مراجع او محاسب قانونى مثلا .... ، هتدرسها عشان تبقي مخصص ف شركتك لاتخاذ القرارات ومناقشة أمور خاصه بالتكاليف والأمور الماليه وهكذا ، خلاص عرفت هتبقي موظف إيه بالظبط ف شركتك ؟ تمام نيجي للتفاصيل

لما تبدأ تدرسها لازم يكون معاك شوية حاجات
 ** جدول مذاكرة تمشي عليه
 ** فيديوهات شرح
 ** كتاب للشرح تقرا منه
 ** كتاب اسأله تحل منه
 ** قاموس ترجمه سواء موقع أو تطبيق
 ** مذكرة فاضية أو كشكول

أولا .. خطة مذاكرة
قبل ماتبدأ تكون عارف نفسك هتذاكر ازاي وامتي والكميه والمدة قد ايه ودا كله هيكون ف الجدول اللي انت هتعمله طبقا ل طريقة المذاكرة اللي تريحك وتتماشي مع يومك وهتلاقي خطة للمذاكرة عالموقع بالتفصيل من هنـــــا
ملخصها كالآتي
خصص ٣ ساعات يوميا ، كل موضوع من موضوعات الوحدة ف يوم ، ال٣ ساعات دول لازم تنجز فيهم الآتي
- تشوف فيديو الموضوع وأثناء متابعتك ليه تسجل ملاحظاتك للنقاط الهامة اللي بتكون موضع لعب ف الأسأله ودي انت هتعرفها لوحدك والمحاضر بردو هتلاقيه بيركز عليها
- بعد الفيديو هتقرا الموضوع من الكتاب عشان تتعرف ع المفردات وتركز عليها وتفهم معناها
- بعد القراءة هتحل الاساله الخاصه بالموضوع طبقا للمرحلة الأولي من مرحلتي حل الأسأله , التفاصيل بالكامل عن حل الأسأله من هنـــــا
طيب انا وقتي ميسمحش اقعد ٣ ساعات اذاكر !!
قسم وقتك بحيث تطلع من اليوم ب٣ ساعات ، يعني خصص من ال٣ ساعات دول وقت المحاضرة ف فترة من اليوم ، وخصص فترة تانية من اليوم لحل الاساله ، وخصص فترة تالته للقراءة من الكتاب ، يعني المهم انك ف نهاية اليوم تسأل نفسك سؤال ،  ذاكرت وقريت وحليت ؟ تجاوب عالتلاتة ب أيوة يبقي كدا تودع اليوم وانت مبسوط

ثانيا ... فيديوهات الشرح
المحاضرات دلوقت بقت متوفرة بشكل مريح بالنسبه للتغييرات ومتنوع من أكتر من محاضر ، فانت مبدأيا تشوف جزء من فيديو لكل محاضر وتشوف اللي طريقة شرحه تتناسب معاك ومع مستوي فهمك وابدأ معاه وهتلاقي كل حاجه عن المحاضرين موجودة هنـــــا

ثالثا ... كتاب الشرح
بعد ماخلصت الفيديو مهم جدا انك تقرا الموضوع من كتاب الشرح لان زي ماقولت دا هيسهل عليك التعرف علي المصطلحات والمفردات الجديدة اللي هتشوفها وهتسمعها من المحاضر ، فلازم تكون حريص علي القراءة ، الموضوع ممكن يكون متعب ف البدايه لكن كل حاجه ف بدايتها صعبة بعد كدا هتلاقي مفردات بتتكرر والمفردات الجديدة هتقل نسبة ظهورها معاك تدريجيا ، فانت هتبدأ من الكتاب الأنسب ليك , وبالنسبة للكتب فاتكلمنا قبل كدا عن هوك وجليم هما أشهر كتابين للcma ومعظم المحاضرين بيشرحوا من جليم , كتب الشرح والأسألة موجودة هنــــــا

رابعا ... كتاب الاساله
بعد ما قريت الموضوع من الكتاب هتحل عليه , في اكتر من كتاب للاساله ، هوك - جليم - ويلي - الريتارد الخاص بالمعهد نفسه ، باختصار كدا افضل كتابين هما جليم والريتارد ودا ليه؟؟ لان كتاب جليم هو افضل كتاب مقارب لنوعية اساله الامتحان - طبعا اساله الامتحان مفيهاش الشغل بتاع مراكز التعليم والدروس الخصوصية والتوقعات و و و -  لانك هتشوف افكار جديدة ف الامتحان ولكن كتاب جليم فكره عالي جدا وممكن يجيبلك افكار هتشوفها ف الامتحان ولكن بطريقة مختلفة ، أما الريتارد دا بيحتوي علي اسأله الامتحان الفعليه الخاصة بالسنوات او الامتحانات السابقة يعني تقدر تقول عليه زي دليل التقويم لكتب وزارة التعليم ، وطبعا دا مهم جدا ولابد من حله وفهمه قبل ماتقدم عالامتحان , ولو باقي معاك وقت بعد حل جليم والريتارد وحبيت تزود من ثروتك في أفكار الأسألة اشتغل على هوك أو وايلي هما كتب كويسة وفيهم أفكار ولكن هوك أفكاره أقل خصوبة من جليم , و وايلي فيه شكاوى كتير من أنه بيجيب أسألة معقدة وأحيانا بتكون مغلوطة

خامسا ... قاموس أو موقع للترجمة
طبيعي جدا انك تبقي تايه ف بدايه المشوار بالنسبه للغة والمصطلحات ودا لانك ف البدايه وبتدرس حاجه اخدتها قبل كدا ولكن مش بالتوسع دا ، فلازم هتحتاج انك تعرف معاني بعض الكلمات او الجمل ، فلو هتستخدم موقع ترجمة استخدم موقع reverso  دا من افضل مواقع الترجمة بالإضافة طبعا لجوجل ترانسليت ، في تطبيق كمان للموقع تقدر تحمله من ج.بلاي للاندرويد

سادسا ... مذكرة او كشكول
أي مذاكرة لازم بتتضمن كتابه بالإيد عشان تثبت ف دماغك فانت هتحتاج مذكرة او كشكول عشان تسجل فيه ملاحظاتك اثناء متابعتك للمحاضر، وتمشي علي نفس النظام دا لحد ماتنهي البارت , لاحظ إنك مش هتسجل كل حرف ينطقه المحاضر وكأنك في محاضرة جامعية ولكن في أفكار بتيجي أثناء الشرح بتكون مهمة جدا 

سابعا ... ملاحظات مهمة
 - بعد نهاية كل وحدة اعمل مراجعه علي اللي فات ودي ممكن تقرا فيها ملاحظاتك السابقة وتحل اسألة عشوائية للوحدات السابقة عشان متنساش الموضوعات دي
 - متحفظش كلمات مفردة ، افهم معني الكلمه وسط الجمله ،
 - متعملش قاموس ترجمة بنفسك وتفضل كل ماتقابل كلمة جديدة تكتبها وتروح تترجمها كدا هتضيع وقت عالفاضي
 - نصيحة ، متبدلش كل شوية بين محاضر والتاني لان في محاضرين بترتب الموضوعات من تاني اثناء شرحها يعني ممكن جزئية ف الوحدة الخامسة يشرحها المحاضر ف الوحدة السادسة او السابعه عشان يسهل عليك الموضوع بشكل اكبر فانت م البدايه تختار المحاضر اللي هتبدأ معاه
 - متكسلش ، الموضوع بسيط بس محتاج عزيمة وإرادة وحماس

بالتوفيق لينا جميعا ان شاء الله 



9 تعليقات
إرسال تعليق
  1. برافو عليك .. عمل اكثر من رائع
    ربنا يجعله فى ميزان حسناتك محمد بيك

    ردحذف
  2. انا طالب بالفرقه الرابعه وهمتحن كمان اسبوع، هل لو انا قدمت حاليا هستفاد بالخصم الخاص بالطلاب؟ وممكن لو فى فيديو يوضح طريقة التقديم على الموقع

    ردحذف
    الردود
    1. بعتذر عن الرد ف التأخير ولكن الخصم متاح دايما ان شاء الله لحد ما الموقع نفسه يوقفه وانا كنت كاتب موضوع عن التسجيل تقدر تشوفه من هنا
      https://www.arabcma.com/2020/01/register-site.html

      حذف
  3. محمد عشري دفعتي وابن مركزي
    وفقك الله ❤️

    ردحذف
  4. محمد عشري دفعتي وابن مركزي
    وفقك الله ❤️

    ردحذف

إرسال تعليق

الاسمبريد إلكترونيرسالة